Ályktun um mótvægisaðgerðir sem gagnast sjávarútvegsfyrirtækjum og sjávarbyggðum.

Í kvöld fundaði bæjarstjórn Vestmannaeyja.  Eðli málsins samkvæmt var ákvörðun sjávarútvegsráðherra um að stöðva loðnuveiðar fyrirferðamest í umræðunni.  Eins og endranær bar bæjarsjórn gæfu til að standa saman í ályktun enda um mikið hagsmunamál að ræða. 

Ályktunin var svohljóðandi:

Ályktun um mótvægisaðgerðir sem gagnast sjávarútvegsfyrirtækjum og sjávarbyggðum.

Bæjarstjórn Vestmannaeyja lýsir yfir þungum áhyggjum vegna stöðu mála í sjávarútvegi í Vestmannaeyjum.  Sú ákvörðun sjávarútvegsráðherra að stöðva loðnuveiðar á hádegi í dag mun þýða 3,8 milljarða tap fyrir sjávarútveginn í Vestmannaeyjum og bætist ofan á 3,6 milljarða tap vegna niðurskurðar á þorskkvóta. 

Vestmannaeyjabær hefur þegar lagt fram ítarlegar tillögur um mótvægisaðgerðir sem stutt getur samfélagið í Eyjum almennt. Bæjarstjórn hvetur ríkisstjórn til að ganga lengra í þá átt sem þá var mörkuð.

Eftir stendur að ef fram fer sem horfir blasir við að sjávarútvegsfyrirtæki verða fyrir slíkum skaða af völdum ákvörðunar um að stöðva loðnuveiðar að aðgerða er þörf gagnvart rekstrarumhverfi þeirra ef ekki á illa að fara.  Í ljósi alvarleika málins leggur Vestmannaeyjabær því þunga áherslu á að ríkisvaldið grípi til eftirfarandi aðgerða tafarlaust:

1. Sjávarútvegur verði styrktur með því að aflétta íþyngjandi álögum.
Bæjarstjórn Vestmannaeyja hvetur eindregið til þess að íþyngjandi álögum á sjávarútvegsfyrirtæki á landsbyggðinni verði aflétt. Horft verði til þess fordæmis, sem sett hefur verið með samningum við álfyrirtæki bæði hvað varðar skattalegt umhverfi og afslátt af raforku. Enn fremur þarf tafarlaust að afnema veiðgjald, lækka tryggingagjald, lækka raforkuverð til fiskvinnslu, lækka opinber eftirlitsgjöld og síðast en ekki síst að lækka flutningskostnað á landsbyggðinni.   Sjávarútvegur er undirstaða flestra byggðarlaga á landsbyggðinni. Hingað til hefur vægi krafna um ríkisþátttöku í atvinnustarfsemi á landsbyggðinni verið svo mikið að henni hefur verið svarað með atvinnustarfsemi sem að mati margra ógnar stöðugleika efnahagslífsins, vaxtarmöguleikum sprotafyrirtækja, alþjóðlegri ímynd Íslands og síðast en ekki síst sjálfri náttúrunni.  Vestmannaeyjabær er fylgjandi ábyrgri nýtingu allra auðlinda en telur að forgangsverkefni eigi að vera að skoða hvort hægt sé að slaka á opinberum álögum í þeirri atvinnugrein sem allir eru sammála um að eigi ákaflega vel heima í íslensku dreifbýli, fiskveiðum og vinnslu.

2. Látið verði með öllu af handaflsaðgerðum í sjávarútvegi.
Bæjarstjórn Vestmannaeyja hvetur eindregið til þess að með öllu verði látið af þeirri löngu úreltu leið að flytja atvinnutækifæri með handafli á milli byggðarlaga á landsbyggðinni. Á hverju ári eru verðmæti upp á milljarða flutt á milli byggðarlaga, frá atvinnusvæðum og fyrirtækjum þar sem arðbært er að gera út. Byggðarlögin sem verst hafa farið út úr þróun seinustu ára þurfa mikla og markvissa aðstoð.  Ástæða er til að hafa sérstakar áhyggjur af stöðu mála á Vestfjörðum og styður Vestmannaeyjabær ábendingar Vestfirðinga í flestu.  Hinsvegar er algerlega ljóst að þá aðstoð þarf að sækja annað en til Vestmannaeyja.  Það kann ekki góðri lukku að stýra að flytja verðmæti með handafli á milli tveggja svæða sem bæði eiga í svipuðum erfiðleikum.

3. Opinber umræða um sjávarútveg verði af meiri ábyrgð en hingað til
Þingmenn sýni alvarlegri stöðu sjávarútvegsfyrirtækja og sjávarútvegssamfélaga tilhlýðanlega virðingu og leggi ekki upp með umræðu sem skaðar sjávarútveginn og samfélög sem byggja afkomu sína á honum.  Sjávarútvegur, eins og önnur svið viðskiptalífsins, þarf að geta treyst því að rekstrarumhverfið sé stöðugt en ekki háð duttlungum stjórnmálamanna. Vestmannaeyjabær er öflugasta sjávarbyggð á landsbyggðinni.  Það er einörð skoðun bæjarstjórnar Vestmannaeyja að friður þurfi að vera um fiskveiðistjórnunarkerfi það sem unnið er eftir þótt eðlilegt sé að það sé ávallt til endurskoðunar.

4. Fræðasvið sjávarútvegs verði styrkt og hafrannsóknir efldar
Bæjarstjórn Vestmannaeyja hvetur eindregið til þess að hafrannsóknir og auðlindafræði verði efld stórlega í sjávarbyggðunum.  Staðreyndin er sú að Íslendingar hafa ekki lagt nægilega mikið upp úr uppbyggingu á rannsókna- og fræðasviði sjávarútvegs. Vilji Íslendingar halda forystu sinni sem sjávarútvegsþjóð þarf að leggja stóraukna áherslu á hafrannsóknir og það fræðasvið sem tengist sjávarútvegi. Engir staðir eru betur til þess fallnir til að sinna slíkri uppbyggingu en þau byggðarlög sem lifa á veiðum og vinnslu.  Nálægðin við atvinnugreinina skiptir sköpum enda það alkunna að fiskifræði sjómanna er vanmetin.

5.  Hafnaraðstaða byggð upp
Vestmannaeyjabær hvetur til þess að rekstrarumhverfi sjávarútvegs verði bætt með aukinni áherslu á uppbyggingu hafnaraðstöðu.  Hafnirnar eru lífæð sjávarbyggðanna.  Uppbygging þeirra er beinn stuðningur við undirstöðu atvinnugreina.  Gera þarf öflugum sjávarútvegsbyggðum kleift að þjónusta fiskveiðaflotann af sóma og auka þar með arðsemi sjávarútvegs.

6. Hvalveiðar verði hafnar af auknum þunga.
Rannsóknastofnanir telja að hvalastofninn éti 1 til 2 milljónir tonna af loðnu á ári og því segir það sig sjálft að veiða þarf hval í samræmi við ástand loðnustofnsins ef ekki á illa að fara.  Íslendingar eru frjáls og fullvalda þjóð og eiga að haga nýtingu nytjastofna í samræmi við eigið gildismat en ekki hræðsluáróður annarra þjóða.

Vestmannaeyjabær telur að í engu megi hvika frá ofangreindum punktum ef sjávarútvegurinn á að þola þær þrengingar sem nú blasa við.  Alþingi og ríkisstjórn þarf því tafarlaust að sýna festu í störfum sínum.  Lýðskrum og vingulsháttur verður að víkja fyrir aðgerðum sem styrkja sjávarútveginn.

Athugasemdir

[Pálmi Gunnarsson, 23.2.2008 kl. 21:35]

Svaraðu nú Elliði ef þú getur ...

[Haukur (IP-tala skráð) 24.2.2008 kl. 10:23]

Kæri Kristinn

Bara til að hafa hlutina á hreinu þá er Elliði Vignisson bæjarstjóri Vestmannaeyja, ekki sveitastjóri í Bakkafirði.  Hans hlutverk er að vinna fyrir sitt samfélag og fólkið sem þar býr.  Ég held þú ættir frekar að vinna í þinni gremju gagnvart andvaraleysi heimabyggðar þinnar við þína sveitastjórn.

Þegar Brimbræður ætluðu að kaupa sig inn í Vinnslustöðina gerðu þeir það á forsendum þess kerfis sem er í gildi, kvótakerfisins.  Eyjamenn vörðust í sama kerfi og hafa til þessa gert það vel.  Kerfinu var í engu breytt í þessum aðgerðum eins og felst í "handaflsaðgerðum" í sjávarútvegi, s.s. byggðarkvóta og fl.  Önnur handaflsaðgerð er að gefa út kvóta, s.s. rúmlega 120 þús. tonna loðnukvóta til íslenskra skipa og taka hann svo til baka...."sorrí, my mistake"?

Ég ætla ekki að fara út í fiskifræðina þar sem ég er hvorki sjómaður né fiskifræðingur.  Sjómenn sem hafa áratugareynslu af loðnuveiðum segja hins vegar að það sé meiri loðna í sjónu nú en áður.  Skipstjórar í bolfiski með áratugareynslu taka undir með þeim, segja að bolfiskur sé fullur af nýrri loðnu allt frá Langanesi og vestur fyrir Ingólfshöfða.  Þeir segja líka að allur fiskur sé um fimm vikum á eftir áætlun, þ.m.t. loðnan en Hafró hlustar ekki.

Mér hefur líka verið bent á að loðnan skipti ekki þorskinn svo miklu máli varðandi vöxt og afkomu.

Og svona til að ítreka það enn og aftur, bæjarstjóri Vestmannaeyja hugar að sínu samfélagi fyrst og fremst.  Er eitthvað óeðlilegt við það?

[Steini (IP-tala skráð) 24.2.2008 kl. 13:08]

Þetta er akkurta málið haukur, menn eru í kvótakerfinu að spila vörn og sókn, alveg eins og í öllum öðrum kerfum. Eyjamenn hafa verið nokkuð duglegir að spila sókn í þessu kerfi undanfarin en svo kemur að því að að þeim er sótt eins og Brimverjar gerðu og þá er ekkert annað í stöðunni en að sýna samhug og berjast saman, þar var engin tvöfeldni í gangi eins og Kristinn svo vitleysislega talar um, fólk sem á í VSV ræður því sjálft hvort og hvenær það selur í VSV og hverjum og það kaus að selja ekki Brimverjum,  því miður þá er samvinna og samhugur á Vestfjörðum nánast enginn, þar hafa menn verið fljótir að selja sig útúr greininn og hlaupa í burtu með gróðann og því miður fyrir Vestfiðringa að þá eru "ötulustu" talsmenn þeirra menn eins og kristinn, sem veður upp um allt vælandi og skjælandi imprandi á því að vandamál Vestfjarðar sé öllum öðrum að kenna en þeim, ég vorkenni mjög Vestfirðingum að ekki finnst skynsamlegra fólk en Kristinn til að tala máli þeirra, hvort sem um er í sjónvarpi, útvarpi eða bloggi.

"Svo komið þið vælandi nú - en það er ekki útséð með að það finnist loðna - er það - en samt eruð þið hágrenjandi um "handafls" aðgerðir  ykkur til handa "

Ég renndi svo yfir þessar tillögur Bæjarstjórnar Ve hérna að ofan og get ekki séð að í þeim felist einhverjar handaflsaðgerðir sem aðeins lúta að Eyjamönnum og það jafnvel á kostnað annar eins og Kristinn ýjar að og eins og t.d byggðarkvótinn virkar, þar sem tekið er af einum til að afhenda öðrum, þetta eru allt saman atriði sem koma til móts við sjávarbyggðir landsins og eru frekar almenn atriði ólíkt hinum vælmikla Kristni sem aðeins talar um aðgerðir sem nýtist fyrst og fremst Vestfirðingum. Það má benda Kristni á að niðurskurður á þorski bitnaði ekki síður illa á Eyjamönnum eins og Vestfirðingum en á meðan Eyjamenn hafa reynt að standa saman í þessum mikla niðurskurði þá fara vælarar eins og Kristinn mikinn á netinu þar sem vandamál Vestfirðinga er öllum öðrum að kenna en þeim.

Ég hitti gamlann félaga minn í Reykjavík fyrir stuttu, ræddum aðeins saman og hann kom m.a inná að hann hefði í fyrsta skiptið farið til Vestfjarða í sumar, hann ætlaði ekki að vilja fara þangað en konan hans náði loksins að draga hann þangað,  hann ætlaði ekki að trúa því að það væri svona fallegt þarna því hann eins og fleiri var búinn að búa til mynd í hausnum af Vestfjörðum og sú mynd var ekki í neinni líkingu við það sem hann sá.  Það er mjög erfitt að ímynda sér Vestfirði sem fallegan stað þegar talsmenn þess eru jafn vitgrannir í málflutningi sínum eins og Kristinn hér að ofan. 

[sjómaður (IP-tala skráð) 24.2.2008 kl. 14:43]

Ágætis grein hjá þér Steini,bara einn stór misskilningur.Kristinn Pétursson er ekki vestfirðingur.