Samþykktir um byggingu knattspyrnuhúss standa: óski ÍBV eftir því að framkvæmdum verði frestað verður það af sjálfsögðu skoðað

Kynlega frétt, um að viðræður séu í gangi milli Vestmannaeyjabæjar og ÍBV um frestun á byggingu knattspyrnuhúss, er að finna í Vaktinni sem kemur út í dag.  Ekki var haft samband við Vestmannaeyjabæ vegna vinnslu fréttarinnar og því sendi ég eftirfarandi fréttatilkynningu til héraðsfréttafjölmiðla nú fyrir stundu.

Eins og kunnugt er hefur Vestmannaeyjabær þegar tekið ákvörðun um að byggja knattspyrnuhús vestan við Týsheimilið.  Áætlaður byggingakostnaður er um 210 milljónir fyrir utan jarðvegsframkvæmdir.  Bæjarstjórn samþykkti einróma að fela umhverfis- og framkvæmdasviði að leita hagkvæmustu leiða til að byggja slíkt knattspyrnuhús í Vestmannaeyjum með það fyrir augum að það verði tekið í gagnið árið 2008.  Vestmannaeyjabær gerir ráð fyrir því að ráðist verði í byggingu og hún tekin í notkun á næsta ári enda hafa engar ákvarðanir verið teknar sem fela í sér breytingu á þessari samþykkt.  Fulltrúar ÍBV íþróttafélags hafa á óformlegan máta rætt það hvort að til greina komi að fresta byggingu knattspyrnuhússins um eitt ár og að sá kostnaður sem annars myndi verða af fjár- og skuldbindingum renna til að mæta erfiðum rekstri.  Berist slíkt erindi frá ÍBV verður það skoðað og metið með tilliti til heildar hagsmuna.  Að öðru leiti standa samþykktir Vestmannaeyjabæjar um byggingu knattspyrnuhúss.

Sem sagt engar viðræður standa yfir og að öllu óbreyttu verður knattspyrnuhús tekið í notkun á næsta ári.  Það er hinsvegar jákvætt og gott að ÍBV leiti allra leiða til að mæta erfiðum rekstri og taka á erfiðri skuldastöðu.  Vestmannaeyjabær mun áfram standa við bakið á ÍBV í þeirri viðleittni og gaumgjæfa vandlega þær leiðir sem ÍBV leggur til.

Athugasemdir

[Þorkell Sigurjónsson, 7.12.2007 kl. 16:15]

Ég ætla rétt að vona það Elliði, að þetta sem þú segir sé rétt og satt og það muni allt standa.  Finnst það skrítin pólitík frá hendi ÍBV ef þeir vilja fá nokkrar milljónir frá bæjarfélaginu út á það, að fresta byggingu knattspyrnuhússins um eitt ár.

[Sigþóra Guðmundsdóttir, 12.12.2007 kl. 09:37]

Takk fyrir upplýsingarnar. Einhvern vegin er maður búin að heyra fullt af skúpi um málið og ágætt að vita að ekki eru neinar viðræður í gangi á milli þessara tveggja aðila. Undarleg fréttamennska samt að setja málið á forsíðu án þess að hafa allar staðreyndir... og allt fjaðrafokið sem það hefur valdið t.d. á spjalli ÍBV síðunnar!