Samgöngur til Vestmannaeyja og Jökulfjarða eru sambærilegar, sem sagt engar.

Samgöngur til Vestmannaeyja komu til umræðu á alþingi í dag.  Eins og fyrr er öllum ljóst að núverandi ástand er algerlega óþolandi.  Með sanni má segja að samgöngur við Vestmannaeyjar séu svipaðar og við Jökulfirði, sem sagt engar.  Munurinn er þó sá að í Vestmannaeyjum búa milli fjögur og fimmþúsund manns.  Hér er atvinnulíf öflugt, mannlíf óviðjafnanlegt og vaxtartækifæri víða.  Bara engar samgöngur.

Bæjarstjórn Vestmannaeyja hefur marg ítrekað lýst sig fylgjandi framkvæmdum í Bakkafjöru að gefnum ákveðnum forsendum.  Fáum dylst að að því gefnu að forsendur þessar gangi eftir þá verður þar um gerbyltingu að ræða.  Hinsvegar eru eðlilega uppi efasemdir um það hvort forsendurnar ganga eftir enda um stórvirki á sviði verkfræði að ræða.  Bæjarstjórn hefur einróma valið að treysta helstu sérfræðingum ríkisins í þessu máli en reglulega minnt á kröfur sínar hvað varðar frátafir, verðskrá, ferðatíðni og fleira. 

Þangað til siglingar komast á milli Vestmannaeyja og Land-Eyjahafnar (Bakkafjöru) þarf hinsvegar að bæta siglingar milli Vestmannaeyja og Þorlákshafnar.  Enda að lágmarki tvö og hálft ár þar til siglingar á nýrri leið geta hafist. 

Eins og flestir muna þá var eitt af fyrstu verkum núverandi bæjarstjórnar að marka sér stefnu í samgöngumálum.  Stefna þessi var samþykkt með 7 atkvæðum á fundi bæjarstjórnar 27. júlí 2007.

Í inngangi að stefnumótun sagði m.a.:
“Fjögur ár eru einfaldlega of langur biðtími eftir bættum samgöngum á sjó við Vestmannaeyjar og verður nú þegar að ráðast í að finna heppilega farþegaferju í stað núverandi Herjólfs sem uppfyllir nútímakröfur.   Núverandi ástand samhliða mikilli aukningu farþega og flutnings með núverandi Herjólfi kallar á bættan skipakost nú þegar. Bæjaryfirvöld í Vestmannaeyjum leggja ríka áherslu á að nú þegar verði hugað að öðrum nýlegum skipakosti í stað núverandi Herjólfs sem orðinn er 14 ára gamall. Slík farþegaferja þarf að uppfylla allar öryggiskröfur sem gerðar eru til farþegaferja og siglinga í Norðurhöfum, hún þarf að stytta siglingartímann milli Eyja og Þorlákshafnar um að a.m.k. 30 mínútur í ferð, taka fleiri ökutæki og flutningavagna og hafa meira svefnrými en núverandi Herjólfur. “

Stefnan var annars á þessa leið:

1.  Herjólfur sigli þrjár ferðir á sólarhring þrisvar í viku yfir sumartímann.  Nærri lætur að næsta sumar nái þetta fram að ganga.  Enn vantar þó eitthvað af ferðum upp á.

2.  Flug milli lands og Eyja verði boðið út og ríkisstyrkur veittur til flugs.  Þetta hefur náð fram að ganga og er flug milli Reykjavíkur og Vestmannaeyja öflugt.

3.  Stærra og nýrra skip verður leigt eða keypt í stað núverandi Herjólfs.  Þetta hefur enn ekki náð fram að ganga og er það verulega miður.  Sú barátta haldur áfram.

4.  Tryggt verði að fullnægjandi skip leysi Herjólf af maðan á slipptöku stendur.  Hér var náttúrulega átt við undirbúna slipptöku en ekki bráðatilvik eins og núna.  Þetta náði fram að ganga og hætt var við að láta flóabát leysa Herjólf af.

5.  Framkvæmdir vegna framtíðarsamgangna skulu hefjast á vormánuðum 2007 og þeim lokið eins fljótt og auðið er.  Þetta hefur náð fram að ganga að hluta til (reyndar ekki vormánuði 2007) umhverfismati er að ljúka, uppgræðsla hefur hafist og ætti hafnargerð að geta hafist innan skamms og vera lokið vor 2010. 

Það er hollt og gott að rifja upp hvað náð hefur fram að ganga og hvað ekki.  Ljóst er að skóinn kreppir þegar kemur að siglingum milli Vestmannaeyja og Þorlákshafnar.  Það er verkefnið sem nú blasir við þingmönnum og ríkisstjórn.  Vilji bæjarstjórnar til þess var kynntur fyrir einu og hálfu ári, frambjóðendur í suðurkjördæmi töldu ekkert í vegi fyrir því að nýtt skip yrði leigt þar til siglingar hefjast í Land-Eyjahöfn (Bakkfjöru) og ríkisstjórn hefur lýst yfir vilja til að bæta samgöngur til Eyja eins mikið og verða má.  Eftir hverju er þá að bíða?

Svona að lokum má geta þess að ég ræddi við Guðmund Petersen rekstrarstjóra Eimskipa fyrr í kvöld.  Hann sagði mér að viðgerð á Herjólfi gengi vel og að allar líkur væru fyrir því að skipið kæmi í áætlun á tilsettum tíma.  Í ljós kom að bilunin var minni en menn óttuðust og dugði að skipta um legur í fjórum skrúfublöðum en ekki þurfti að skipta upp ásleguna eins og menn héldu fyrst.  Unnið er allan sólarhringinn við viðgerðir enda tækifærið notað til að skoða botninn, taka upp vélarparta og fleira, um leið og unnið er að viðgerðum á þeim bilunum sem urðu til þess að taka þurfti skipið úr áætlun.  Þá eru radíomenn að vinna við að koma kallkerfi, útvarpi og sjónvörpum í það ástand sem sæmir farþegaferju.  Við ræddum einnig um mikilvægi þess að ganga tafarlaust til viðhalds á þeim hluta skipsins sem snýr beint að notendum.  Skipta þarf út stólum, bekkjum, sófum, kojudýnum og fleira.  Endurnýja þarf gluggatjöld, bæta aðstöðu fyrir börn, fyrir sjónvarpsáhorf og svo margt fleira.  Enn sem komið er þurfum við notast við þetta skip sem þjónustað hefur okkur vel síðustu 15 ár og á meðan svo er þarf að sinna viðhaldi og sjá til þess að gæðastuðlar taki mið af því að hér er um farþegaferju að ræða sem þjónustar eitt af stærstu byggðarlögum á íslandi.

 

 

Athugasemdir

[Sæþór (IP-tala skráð) 6.12.2007 kl. 00:31]

Það er ótrúlegt hversu miklu þið hafið í raun náð í gegn og það á að meta það, en það vantar punktinn yfir i-ið.  Bakkafjara verður bylting, en þangað til þarf að bæta siglingar til Þorlákshafnar.  Nú reynir á nýjan samgönguráðherra sem enn hefur lítið gert annað en að taka ákvörðun sem Stulli var þegar búinn að boða.  Við þurfum stærra og betra skip til ársins 2010 og Kristján og Róbert Marshal eiga að ganga í það mál.

[solla (IP-tala skráð) 6.12.2007 kl. 10:18]

Hvort sem bakkafjara verður að veruleika eða ekki þá verðum við að fá nýtt skip. Mér finnst ekki hægt að bjóða fólki upp á þetta lengur hvorki okkur sem búum hérna né gestum. Ég segi nú eins og ein góð kona sagði "Mér er farið að líða eins og Robinson Krúsó....................kveðja

[Bjartmar Oddur Þ Alexandersson, 6.12.2007 kl. 15:33]

Sæll

Auðvitað er mikilvægt að það séu ágætis samgöngur til að tengja landið saman. En stundum er bara verið að horfa framhjá þeim stórum hlutum í gatnakerfi landsins þar sem mesta umferðin er, og hún er í Reykjavík. Hví ætti íslenska ríkið að leggja milljarða fyrir 5000 manns þegar það leggur ekki milljarða fyrir 150.000 manns. Það þarf að forgangsraða hlutum, Sundabraut þarf að koma fyrst, mislæg gatnamót á Bústaðaveg og Reykjanesbrautar, Öskjuhlíðargöng og ég get haldið endalaust áfram.

[Steini (IP-tala skráð) 7.12.2007 kl. 09:27]

Bjartmar er m.ö.o að segja að íbúafjöldinn á að ráða og þar af leiðandi Reykjavík, þannig að ef við færum eftir þeirri formúlu þá yrði hvergi látnir peningar í samgöngur nema á höfuðborgarsvæðinu!!! En það skrýtna er og sem aðalega Reykvíkingar vita ekki og það er að fólk á höfuðborgarsvæðinu er ekki það eina sem borgar skatta, Eyjamenn borga mikla skatta, og sjávarútvegur í Eyjum skilar gríðarlegum fjármunum í kassa landsmanna og Eyjamenn hafa núna í 15 ár ekki fengið neinar samgönguúrbætur!!!! Getur þú sagt Bjartmar að ekkert hafi gerst í samgöngum í Rvk í 15 ár?   Varðandi Sundabrautina þá geta Reykvíkingar (amk rúmlega helmingur þeirra) ekki kennt neinum öðrum en sjálfum sér með það að hún sé ekki komin, Reykvíkingar kusu R-listann og hann fór með sundabrautina fram og tilbaka í 12 ár og ekkert kom útúr þeirri vinnu á meðan fjármagnið beið og beið. Eyjamenn borga mikla skatta sem og t.d Akureyrirngar ofl og ætlast að sjálfsögðu til þess að verða færðir inní nútímann með samgöngurnar, ef forgangsraðað yrði eftir íbúafjölda þegar kemur að samgöngum þá er ljóst að engin landsbyggð verður á íslandi þar sem aðeins höfuðborgarbúar sætu einir að kökunni og snæddu hana alla og það þrátt fyrir að öll landsbyggðin ætti stórann hluta í henni.

Annars borga Eyjamenn fyrir sínar samgöngur með því að greiða í Herjólf, Norðlendingar og sérstaklega Akurnesingar borga fyrir sínar samgönguúrbætur með því að greiða í göngin, spurning hvort ekki eigi að taka þetta upp í Rvk, að farið verði í Sundabrautina ofl aðgerðir og settir yrðu þar upp vegatollar þannig að þeir sem nota þetta yrðu látnir greiða fyrir það? Þannig er víða farið að erlendis.