Vosbúð: Hugmynd ungmenna verður að veruleika.

Í gær opnaði Vosbúð, kaffi- og menningarhús ungmenna í Vestmannaeyjum.  Með þessu er að rætast langþráður draumur ungmenna hér í Eyjum þar sem aðstöðuleysi þeirra hefur verið algert seinustu ár.  Aðstaðan í Vosbúð er til fyrirmyndar og ljóst að vandað hefur verið til verka í hvívetna.  Umgjörðin öll er björt og falleg, stórir gluggar þannig að starfsemin verður áberandi fyrir þá sem eru á “rúntinum”.  Í Vosbúð má svo finna risa flatskjá, þráðlaust net, Playstation 3 tölvu, fótboltaspil og billiardborð og fleira. (á myndinni hér til hliðar er ég að taka sigurskotið í Billiard þegar ég vann Jens Kristinn með miklum glæsibrag við opnun Vosbúðar).

Auðvitað veldur svo hver á heldur og nú reynir á ungmennin sjálf að sýna aðstöðunni virðingu og nýta hana vel. 

Ástæða er til að fagna þessum áfanga sérstaklega enda er það ljóst að aðbúnaður ungmenna á aldrinum 16 til 25 ára ræður miklu um val þeirra um framtíðarbúsetu. 

Í aðdraganda kosninga í fyrra vor fórum við þá leið að stefna til okkar hundruðum Eyjamanna til að stilla strengi okkar og vinna að sameiginlegri stefnuskrá.  Í þeirri vinnu kom fram einbeittur vilji ungmenna til að aðstaða þeirra til tómstundaiðkunar yrði bætt verulega.  Af sjálfsögðu var því vel tekið og í stefnuskrá okkar fyrir kosningar stóð: “Við ætlum að efla aðstöðu fólks á aldrinum 16 – 20 ára til tómstundaiðkunar.  Í því samhengi viljum við líta til menningar- og upplýsingarmiðstöðvar fyrir ungt fólk.”  Það er alltaf ánægjulegt þegar hægt er að standa við stór orð.  Sömuleiðis er það ánægjulegt þegar hugmyndir ungs fólks ná fram að ganga.

Athugasemdir

[Smári McCarthy (IP-tala skráð) 29.11.2007 kl. 18:24]

Frábært framtak! Gaman að þessu. 

Höfum samt í huga að þetta var reynt fyrir nokkrum árum. Húsið var prýðileg tilraun til hins sama en gekk þó ekki eftir sökum þess að félagið var rekið út úr húsnæðinu sem það hafði til afnota og bæjaryfirvöld vildu ekki koma til móts við þá í þessum efnum.

Ég vona að þetta verði ekki annað eins rugl. Jafn frábært og það er að fá svona hressleika inn í tómstundalíf Eyjanna þá yrðu það vonbrigði ef að þetta myndi loka aftur.

[Pálmi Harðar (IP-tala skráð) 29.11.2007 kl. 23:09]

hlaut að vera að þú værir að spila við jens kristinn. skýrir af hverju það eru svona margar mislitar kúlur á borðinu á myndinni   .

 Annars hlakka ég mjög til að skoða þetta þegar ég kem heim eftir prófin. Ég sé fyrir mér að ég muni vinna glæsta sigra á þessu pool-borði hehe....en þetta er stórglæsilegt í alla staði og nú er bara að snúa bökum saman og nýta sér þessa topp aðstöðu.

Kveðja úr borg óttans,

pálmi harðar 

ps. hvernig væri að smala í góðan handboltaleik um jólin?  ungir vs. gamlir.

annars veit maður ekki hvort að þið þorið enda orðin tvö ár síðan þið þorðuð síðast í bikarkeppni Hsí. 

[Andri Eyvinds (IP-tala skráð) 2.12.2007 kl. 22:02]

Ég er sáttur með þetta, og ég er viss um að þetta eigi eftir að nýtast betur en hitt húsið sem var á Vestmannaeyjabraut. Það er allavega pool borð á nýja staðnum. Hlakka til að prufukeyra húsið um jólin.