"...hann er spilltur, frekur og hreinlega minniháttar á andlega sviðinu"

Sonur minn var í dag að dunda sér við tölvuna eins og svo oft.  Í leik sínum "gogglaði" hann nöfn fjölskyldumeðlima.  Ein af greinunum sem hann rakst á um "kallinn hann pabba" var þessi umfjöllun af spjallsíðu þar sem verið var að ræða málefni flugsamgagna milli lands og Eyja: (Myndin hér til hliðar er af lífæð Vestmannaeyja, höfninni, en hefur ekkert að gera með þessa bloggfærslu.  Myndina tók ég núna í haust)

"Mér er ekki í nöp við Vestmannaeyinga frekar en aðra landsmenn. Ég hef aldrei talað niður til Vestmannaeyinga sem einhverskonar heild, hvorki nú né áður. Margir hafa kastað sér fram á ritvöllinn og kallað þá frekjuhunda og vitleysinga en það hef ég ekki gert.

Hinsvegar hef ég ekki farið leynt með fyrirlitningu mína á Elliða Vignissyni, eða Bulliða bæjarstjóra eins og "Fernandos" uppnefndi hann og ekki að ósekju. Ef við lítum nú til baka og skoðum hans afrek rétt sem snöggvast:

Hann eyddi hálfu ári í að rífa kjaft í fjölmiðlum vegna þess að vinur hans, flokksfélagi og framkvæmdastjóri Flugfélags Vestmannaeyja klúðraði sjúkraflugsútboðinu með græðgi.

Nú síðast heimtaði hann að sjúkraflugssamningi þeim er Landsflug hefur við heilbrigðis og tryggingaráðuneytið verði sagt upp tafarlaust í ljósi niðurstaðna skýrslu sem vinnuhópur gerði á vegum ráðuneytisinns. Í þeirri skýrslu er sýnt fram á þrjú frávik frá hámarks útkallstíma í fyrsta stigs útköllum. Í einu tilfellinu þótti heilbrigðisstofnun Vestmannaeyja hafa gefið mjög óljósar upplýsingar um stig útkallsinns, í öðru tilfellinu fór Landsflug fimm mínútur yfir hámarkstíma og í því þriðja var ekki haft samband við Landsflug þegar útkallið kom, heldur haft beint samband við Landhelgisgæsluna þannig að ekki verður úr því skorið héðan af hvort að Landsflug hefðu getað staðist útkallstímann.

Einnig kemur fram hörð gagnrýni á vinnubrögð heilbrigðisstofnunar Vestmannaeyjabæjar varðandi slök vinnubrögð við útköll og einnig er það gagnrýnt, bæði á umræddu tímabili sem og því tímabili er Flugfélag Vestmannaeyja sinnti þessu flugi, að læknar voru ekki sendir með í fyrsta stigs útköll í mörgum tilfellum.

Þessi skýrsla fjallaði um tímabilið frá 1. jan og fram í júní. Síðan þá hlýtur allt að hafa staðist eins og stafur á bók hjá Landsflugi varðandi þetta sjúkraflug því annars hefðum við heldur betur heyrt af því frá Elliða! Engu að síður þá heimtar hann nú að samningnum verði tafarlaust sagt upp. Án nokkurs efa til þess að vinur hans hjá Flugfélagi Vestmannaeyja geti tekið við á ný!

Í sambandi við áætlunarflug til Vestmannaeyja þá hefur Elliði látið það frá sér fara í vitna viðurvist að hann muni allt til þess vinna að Vestmannaeyingar ferðist ekki með Landsflugi. Hann fór mikinn í fjölmiðlum um hversu ómögulegt það væri að fljúga þangað á 19 sæta vélum, alveg þangað til það stefndi í að Flugfélag Vestmannaeyja tæki við þessum sömu vélum til þess að sinna þessu flugi. Þá skyndilega steinþagnaði hann sem og aðrir meðreiðarsveinar hans og orrustupennar.

Þegar Landsflug svo hætti að fljúga til Vestmannaeyja lét Elliði prenta "Flugfélag Íslands" á ennið á sér, heimtaði 36 sæta vél með jafnþrýstibúnaði, bullaði slík ósköp um kosti þesskonar vélar, meðal annars með heimskulegum og amatörslegum fullyrðingum um að vél með jafnþrýstibúnaði gæti svindlað á náttúrulögmálunum.

Ég segi það enn og aftur, ég hef ekkert á móti því fólki sem býr í Vestmannaeyjum, á ættir sínar þangað að rekja, tengist eða hefur á einhvern hátt tengst þessu bæjarfélagi. Persónulega hef ég ekkert á móti ríkisstyrk á eyjar. Hinsvegar verður að nota almenna og heilbrigða skynsemi þegar kemur að því að setja kröfur um slíkt útboð.

Þar sem Elliði hefur margsinnis sýnt fram á það að hann er ekki búinn því nauðsynlega elementi sem heilbrigð skynsemi er, þar sem hann hefur sýnt framá verstu tegund fyrirgreiðslu pólitíkur sem ég hef séð síðan Framsóknarflokkurinn var stærsti flokkur landsinns, þar sem hann , þá vil ég meina að það yrði Vestmannaeyjum til mikilla heilla að sjá á bak honum úr embætti!"

Á öðrum stað á sömu síðu stendur:

"...og eins það að bæjarstjóri vestmannaeyja sat á fundi með framkvæmdarstjóra Landsflugs fyrr í sumar og sagði að hann myndi gera allt sem í hans valdi stæði til að eyjamenn myndu ekki fljúga með Landsflugi eftir 1 sept.

Ég get vottað að þetta er satt. Sá aðili sem er búinn að eyðileggja allt flug mill Vey - Rvk er Elliði Vignisson

Hvet alla til að skoða myndina sem Sigmund skopteiknari hjá Morgunblaðinu teiknaði af Elliða um daginn, þar sem Elliði var að leika sér í sankassa, og spurt var hvenær hann ætlaði að þroskast."

Syni mínum fannst þetta vægast sagt mjög kómískt og fór með langan fyrirlestur um siðfræði netnotkunar sem hann fékk víst þegar hann var í tölvukennslu í fyrra, þá níu ára gamall. 

Ég er sammála honum hvað skemmtigildi þessarar lesningar varðar, en það er ef til vill ekki að marka mig þar sem ég er "minniháttar á andlega sviðnu" ;)

Athugasemdir

[Georg Eiður Arnarson, 12.11.2007 kl. 10:42]

Ég skora á þig Elliði að birta nafn þess aðila sem skrifar svona, þótt fólk sé ekki sammála, þá eru svona skrif þessum aðila til skammar og ætti í raun að banna svona fólki að skrifa. Mín skoðun . kv. 

[Soffía Sigurðardóttir, 12.11.2007 kl. 10:53]

Bloggarar athugið! Lykla-Pétur er búinn að leggja stóru rykföllnu bókina til hliðar.

Nú Googlar hann bara upp bloggið ykkar við Gullnahliðið!

[Þorkell Sigurjónsson, 12.11.2007 kl. 12:22]

Spakmælið  segir allt sem segja þarf um níðskrifin um bæjarstjórann okkar, Elliða Vignisson:

Sá, sem níðir góða menn, svívirðir sjálfan sig;

sá sem fleygir flöskunni upp í loftið,

fær hana sjálfur í kollinn. 

[María Kristjánsdóttir, 12.11.2007 kl. 17:26]

Æ, Soffía, þetta var góð athugasemd- ég ætla að skrifa þetta hjá mér.

Já, Elliði, það er gott að vera minntur á þessa tengingu- barnið -fjölskyldan við hlið einstaklingsins sem verið er að ráðast á.

[Ólafur Þórðarson, 12.11.2007 kl. 20:24]

Góður þessi með Lykla Pétur!

Er ekki þreytandi að eyða hálfu ári í að rífa kjaft? Ég fæ hálsbólgu að tala bara í 1 klst!

[Hildur Sólveig Sigurðardóttir (IP-tala skráð) 12.11.2007 kl. 21:07]

Sá aðili sem er búinn að eyðileggja allt flug mill Vey - Rvk er Elliði Vignisson
.... ha ha þessi er nú bara brandari... veit ekki betur en að flugsamgöngur á milli lands og eyja hafi sjaldan verið jafn góðar, reglulegt flug á milli lands og eyja með fokker 50 (þvílíkur lúxus - maður fær súkkulaði og allt um borð :D) og hvorki meira né minna en tvö flugfélög á bakka; flugfélag vestmannaeyja og vængir

... ég hef a.m.k. aldrei flogið jafn oft á milli síðustu ár (án þess þó að allt bröltið með handboltaskvísunum teljist með) 

[Benedikt Sigurðarson, 12.11.2007 kl. 21:44]

Veit ekki hvort við eigum sjálf að rekja svívirðingar og kjaftæði sem er ausið yfir . .  land og lýð og líka börnin okkar.  Hvet þig til að eyða færslunni  . . . því málflutningurinn segir meira um þann sem skrifar og svona geysar heldur en þann sem skrifað er um - - eða ég vil trúa því.

Þannig er það nú oftast  -- stóryrðin spilla málstaðnum og það á ekki að samþykkja þau  - - það á að fordæma þau

[Guðfinna (IP-tala skráð) 13.11.2007 kl. 19:15]

Kannast ekki við þessa hlið á Elliða sem lýst er hér að ofan, þvert á móti en hvað veit ég fávís konan.

Er hinsvegar um margt ósammála hugmyndum hans um jarðgöng og bakkafjöru og hvernig hann setur þær hugmyndir fram. Það gerir Elliða samt ekkert að ofantöldu...

Kveðja til Eyjunnar fögru

[Leifur Jó (IP-tala skráð) 14.11.2007 kl. 22:22]

Sá sem skrifar þessa grein gengur nú ekki heill til skógar... Elliði er að standa sig virkilega vel í starfi og hugsar um hag Vestmannaeyja fyrst og fremst, og hann gerir það þó hann sé Týrari ;D