Stöndum saman, þannig náum við árangri

24.10.2007 | 22:58

Stöndum saman, þannig náum við árangri

Í dag kom bæjarráð saman á aukafundi til að ræða kröfur og óskir heimamanna vegna væntanlegs útboðs á siglingum milli Vestmannaeyja og Bakka. Ég hef áður bent á það hversu mikilvægt það er að kröfur og óskir Vestmannaeyjabæjar vegna ferjusiglinganna liggi fyrir áður en rekstur og eignarhald verður boðið út. Ég er því afar sáttur með framgöngu bæjarráðs í þessum efnum þar sem það hefur nú komið sér saman um minnisblað undir heitinu “Sjónarmið Vestmannaeyjabæjar vegna fyrirhugaðs útboðs á hönnun, smíði og rekstri ferju milli Bakka og Vestmannaeyja. Þrátt fyrir að minnisblaðið hafi verið lagt fyrir bæjarráð þá skrifa allir sjö bæjarfulltrúarnir undir skjalið og því alger einhugur í bæjarstjórn um allt er snýr að siglingum milli Vestmannaeyja og Bakka. (myndin til hliðar er af syni mínum)

Meðal þess sem fram kemur í minnisblaðinu er:

Vestmannaeyjabær gerir kröfu um að...

... skipið beri 55 bíla og 350 farþega
... frátafir verði ekki meiri en þær hafa verið í siglingum til Þorlákshafnar
...15 til 20 kojur verði í skipinu
... ferðatíðnin verði ekki minni en 6 ferðir á sólarhring yfir vetrartímann (15. sept. til 1. maí) og 8 á sólarhring yfir sumartímann (1. maí til 15. sept).
... fyrsta ferð sé farin ekki síðar en 07.00 frá Eyjum og seinasta ferð til Eyja sé um 23.00.
... fullorðinn greiði kr. 500 fyrir fargjaldið (veittur verði 40% magnafsláttur (einingar) og verð þá kr. 300.00)
...greitt verði kr. 500 fyrir fólksbíl og jeppa (veittur verði 40% magnafsláttur (einingar) og verð þá kr. 300.00)
...gjaldheimta fyrir börn verði ekki meiri en nú er og því verði gjaldfrjálst fyrir börn yngri en 12 ára.
... eldri borgarar, öryrkjar, skólafólk og börn á aldrinum 12 til 18 ára greiði kr. 250 (veittur verði 40% magnafsláttur (einingar) og verð þá 150 krónur.
... aukinn afsláttur sé gefinn við aukin magnkaup (stærri einingakort). Lagt er til að slík magninnkaup veiti allt að 60% afslátt til þeirra sem mikið nota ferjuna.
...far- og farmgjöld taki mið af því að hér er um þjóðveg að ræða. Þannig er gerð sú krafa að kostnaður vegna farmgjalda verði ekki meiri en sem nemur því ef viðkomandi leið væri ekin.

Einnig er varað við því að samið sé við einn aðili um rekstur í 15 ár og að farið fram á að ekki verði samið til lengri tíma en 5 ára og í 1 – 2 ár til að byrja með á meðan reynsla er að komast á þessar nýju samgöngur og gengið út frá því að hafnarmannvirki og önnur mannvirki í Bakkafjöru verði í rekstri eigenda hafnarinnar þ.e.a.s. sveitarfélaganna Vestmannaeyjabæjar (60%) og Rangárþings Eystra (40%).

Mikið af því sem fram kemur í minnisblaðinu snertir ekki beinlínis stýrihóp þann sem nú starfar að framkvæmdinni heldur hefur að gera með stjórnsýslulegar ákvarðanir samgönguyfirvalda og ríkisstjórnar allrar. Því er afar brýnt að fjallað verði um óskir þessar og kröfur bæði innan stýrihópsins sem og á pólitískum vettvangi. Nú reynir á hvort stjórnmálamennirnir okkar eru tilbúnir til að gæta hagsmuna okkar.

Það er einróma skoðun bæði mín og bæjarráðs að sé til þess pólitískur vilji sé hægt að lyfta grettistaki í samgöngum milli lands og Eyja og þar með í þróun samfélagsins. Leiðin sem hefur verið valin er sigling í Bakkafjöru og nú þurfa Eyjamenn að flykkja sér á bak við sameiginlegar óskir, ábendingar og kröfur. Einungis þannig getum við tryggt að tekið verði fullt tillit til sjónarmiða okkar.

Flokkur: Stjórnmál og samfélag | Breytt s.d. kl. 23:12 | Facebook

Athugasemdir

Þetta er magnað. Hvernig er hægt að vera á móti þessu? Hjón á bíl með 1 ungling og 2 börn yngri en 12 ára fara samkvæmt þessu milli lands og Eyja fyrir 1050 kr. ef keyptar eru einingar. Svo geta þau valið um allt að 8 ferðir. Það er hlægilegt að hafa áhyggjur af keyrslu til Reykjavíkur, tekur um 90 mínútur og allt á mjög góðum vegi nema heiðin sem verður búið að laga áður en þetta kemst í gagnið. Hvað ætlar nú liðið sem mest hefur verið að rífa þetta niður að tala um. Hættu að fá loftstein í hausinn? Áttum okkur á því að þetta snýr um það hvort okkur tekst að halda byggð hér í Eyjum á þeim standart sem nú er að sætta okkur við að fólk vill ekki búa hér á meðan það þarf að sigla í Þorlákshöfn

Andrea (IP-tala skráð) 24.10.2007 kl. 23:19

Ágætis ályktun Elliði eða réttara sagt óskalisti. vonandi gengur þetta eftir en það sem af er þessu ári eru komnir um 40 dagar þar sem er meira og minna ófært. Ef Gísli Viggósson hefur rétt fyrir sér og höfnin verður í lagi, er þá ekki líka rétt hjá honum að ófært sé við 3,5 metra ölduhæð? Ég vill benda á að 2004 til 2006 (árin sem Gísli rannsakaði Bakkafjöru) eru einhver bestu árin veðurfarslega sem komið hafa í eyjum á 20 ára sjómannsferli mínum . Vonandi verður rétt það sem hentar okkur í skírslu Gísla, en rangt það sem hentar okkur ekki. kv.

Georg Eiður Arnarson, 25.10.2007 kl. 07:37

Mér finnst alveg gleymast í þessari umræðu hvað á að vera í matinn um borð. Einnig er ekkert talað um hvers konar afþreying verður í boði t.d. lesefni, videó, bíósalur, bar og annað sem er nauðsynlegt í svona skip.

Mér finnst líka í ljósi umræðunnar um Grímseyjarferjuna sem kostar um 500 milljónir fyrir 100 íbúa eyjarinnar eða 5 milljónir á mann að Vestmannaeyjaferjan megi þá kosta 4500 sinnum 5 milljónir eða 22,5 milljarða. Það þýðir að það hljóti að fást fleiri en 20 kojur í skipið? Það hlýtur að mega fara vel um mannskapinn þegar sjóveikin herjar!

Svo finnst mér að ekki eigi að mismuna fólki eftir aldri, kyni eða stöðu í samfélaginu, allir borgi 100 kall fyrir farið. Það gerir innheimtu einfaldari, sparar gjaldkeranum það að rannsaka hvort farþeginn sé barn, gamalmenni, fatlaður, öryrki, geðveikur, þjófóttur, alþingismaður, nemandi eða stórafsláttarkúnni.

Ég get alveg komið með fleiri tillögur og kröfur

Haukur Nikulásson, 25.10.2007 kl. 11:02

Sæll Þórir, að gefnu tilefni þá skal það tekið fram að ég er ekki talsmaður gangna til eyja og ég treysti einmitt verkfræðingunum, þess vegna hef ég áhyggjur af þessu. Í skírslu um Bakkafjöruhöfn eru fjölmörg, ef þetta og ef hitt, þetta finnst mér ekki boðlegt.

Georg Eiður Arnarson, 25.10.2007 kl. 11:44

Haukur. Með þessu verðlagi á ferju milli lands og eyja væri hægt að smíða skip sem næði á milli og á er hægt að keyra í land. Ekki nein neðansjáfargöng heldur ofansjáfar skip sem nær á milli.

Brynjar Hólm Bjarnason, 25.10.2007 kl. 21:22