Góð nótt í Eyjum

Um daginn fórum við nokkrir félagar í miðnætursiglingu hér umhverfis Caprí norðursins.  Lagt var af stað um miðnætti.  Við byrjuðum á að sigla út að Einadrangi.  Einidrangur er vestasta skerið í Vestmannaeyjaklasanum og stendur eitt og sér,  í um 20km fjarlægð vestur frá Heimaey. Þar vorum við svo lukkulegir að rekast á þessa vinalegu háhyrninga.  Mér þótti magnað að þótt við værum forvitnir um þá var ekki laust við að forvitnin væri gagnkvæm.

Eftir þetta fórum við út að Surtsey. Eins og þekkt er getur orðið mjög vindasamt við Surtsey og öldurót þar mikið. Sem dæmi má nefna að í aftakaveðri 8. - 9. janúar 1990 mældist ölduhæð allt að 14 metrar suðaustur af Surtsey, en það svarar til þess að stærstu öldur hafi orðið um 20 metrar á hæð.  Brimrof er því mikið í Surtsey. Það kom mér því ekki svo mjög á óvart hversu mjög eyjan hefur breyst frá því að ég kom þangað seinast.  Til að mynda er þar engin sandfjara í dag.

Frá Surtsey héldum við út í Geirfuglasker og príluðum þar upp.    Geirfuglasker (öðru nafni Freykja) liggur allt að mílu í suðvestur frá Súlnaskeri.  Skerið er lítið (svona svipað og Bjarnarey) og keilumyndað, en grasi vaxin laut ofan í kollinn á því. Þangað hafði ég ekki komi áður og kom það mér á óvart hversu mikil fýla og svartfuglabyggð er þar. 

Úr Geirfuglaskeri lá leiðin út í Brand.  Hún er gíglaga nema suðurhlið gígsins hefur orðið sterkri suðuröldunni að bráð og rofnað burt.  Greinilega má sjá 5 m háan gígtappa við rætur suðurbrekkunnar og þessi gerð eyjarinnar gerir hana kjörna til heimsókna þar sem nánast er um náttúrulega höfn að ræða. Þá spillir ekki fyrir að "Brandararnir" eru höfðingjar heim að sækja enda mannval þar mikið.  Vel var tekið á móti okkur og ég er ekki frá því að "vatnið" í Brandi sé göróttara en víða annarstaðar.

Á heimlið renndum við upp að Suðurey og ég hef aldrei séð jafn mikið af Lunda.  Greinilegt að fuglinn hræðist ekki Suðureyinga enda þar miklir friðunnar sinnar og hefur háfi ekki enn verið slegið í Suðurey þetta sumarið.  Heim var komið um 05.00 og því ekki laust við að dálítillar þreytu hafi gætt þegar ég vaknaði til vinnu kl. 07.30. Allt var þetta þó vel þess virði.

Athugasemdir

[Vinir Ketils bónda, áhugamannafélag, 20.7.2007 kl. 09:05]

Gott að heyra að þér hafi verið vel tekið í Brandinum, þótt það komi vitaskuld ekkert á óvart, enda einvala lið öðlinga sem skipar þjóðflokk Brandara.

En er Geirfuglaskerið á reki? Þú segir að það liggi allt að mílu frá Slúnaskeri.