Óháð mat á þörf fyrir frekari rannsóknir vegna jarðganga til Eyja

Í gær ræddum við samgöngur í bæjarráði.  Svohljóðandi tillaga var samþykkt með meðfylgjandi greinargerð:

TillagaBæjarráð Vestmannaeyja leggur til við stjórnvöld að óháðu ráðgjafafyrirtæki á sviði jarðvegsrannsókna og jarðgangagerðar verði falið að leggja mat á þörf fyrir frekari rannsóknir vegna jarðganga milli lands og Eyja og væntanlegum kostnaði af þeim ef svo ber undir. GreinargerðÁkvörðun um framtíðar samgöngur milli lands og Eyja er stærsta ákvörðun sem tekin hefur verið í seinni tíð hvað hagsmuni Vestmannaeyja varðar.   Bæjarráð fagnar þeim mikla vilja sem nú er til staðar til að bæta samgöngur við Vestmannaeyjar eins og fyrirliggjandi samgönguáætlun ber með sér.  Aldrei áður hefur verið gert ráð fyrir jafn mikilli uppbyggingu á samgöngum við Vestmannaeyja enda gert ráð fyrir að fimm milljörðum króna verði á næstu þremur árum varið til þessa verkefnis. Bæjarstjórn Vestmannaeyja hefur forgangsraðað möguleikum þannig að jarðgöng séu besti kosturinn og þar á eftir komi ferjusiglingar milli Vestmannaeyja og Bakka. Þessi forgangsröðun hefur þó byggt á því að hægt sé að treysta því að allar forsendur beggja möguleika hafi verið kannaðir. Engum dylst að trúnaður ríkir ekki milli Vegagerðarinnar og Ægisdyra hvað varðar mat á forsendum fyrir jarðgangagerð milli lands og Eyja.  Báðir aðilar hafa sér til halds og trausts ábyrga og viðurkennda sérfræðinga en engu að síður hafa aðilar véfengt fullyrðingar og niðurstöður hvors annars.     Fulltrúar Ægisdyra hafa bent á að til þess að hægt sé að kostnaðarmeta jarðgöng milli lands og Eyja þurfi frekari rannsóknir að koma til en þessu hafa fulltrúar Vegagerðarinnar andmælt.  Þá hefur Vegagerðin haldið því fram að litlar viðbótarupplýsingar fáist með þeim rannsóknum sem Ægisdyr og Vestmannaeyjabær hafa ítrekað óskað eftir og talið að kostnaður vegna þessara rannsókna verði umfram áætlanir. Bæjarstjórn Vestmannaeyja telur að í slíku umhverfi sé ekki hægt að komast að trúverðugum niðurstöðum um forsendur jarðganga milli lands og Eyja.  Sem fulltrúi langstærsta hagsmunaaðila leggur bæjarstjórn Vestmannaeyja því til að óháðu ráðgjafafyrirtæki á sviði jarðvegsrannsókna og jarðgangnagerðar verði falið að leggja mat á þörf fyrir frekari rannsóknir og væntanlegan kostnað af þeim ef svo ber undir.   Vestmannaeyjabær telur mikilvægt að slíkar niðurstöður liggi fyrir áður en endanleg ákvörðun verður tekin um framtíðar samgöngur milli lands og Eyja og því áríðandi að áhersla verði lögð á að slíkur aðili vinni áliti sitt eins hratt og auðið er. Vestmannaeyjabær telur einnig afar mikilvægt að fulltrúar Vegagerðarinnar og Ægisdyra beri báðir traust til þess aðila sem fyrir valinu verður og því er ef til vill rétt að um verði að ræða erlendan aðila, sem ekki hefur áður haft aðkomu að málinu.   Um leið leggur Vestmannaeyjabær ríka áherslu á að áfram verði haldið með rannsóknir og undirbúning gerðar hafnar í Bakkafjöru eins og áætlanir gera ráð fyrir.

Von mín og trú er sú að stjórnvöld fari tafarlaust í að finna slíkan hlutlausan aðila enda það afar mikilvægt að þeim spurningum sem enn er ósvarað hvað jarðgöng varðar verði svarað núna á næstu vikum.  Stóra spurningin núna er "Þarf frekari rannsóknir til að geta metið kostnað við jarðgöng milli lands og Eyja".

Athugasemdir

[Borgþór Ásgeirsson (IP-tala skráð) 22.2.2007 kl. 20:31]

Glæsilegt

Ég vona stjórnvöld fari strax í málið það væri þá loksins hægt að fá hlutlaust mat sem mér finnst hafa sárvantað í þessu máli. Báðir aðilar geta varla haft rétt fyrir sér svo þetta verður góð viðbót 

[Grétar Ómarsson, 23.2.2007 kl. 19:07]

Sæll Elliði, gaman að sjá virknina í ykkur. HALDA ÁFRAM AÐ BERJAST !!

það verður að forgangsraða rétt, við getum ekki horft upp á það að láta Samgönguráðuneitið eða vegagerðina segja okkur Eyjamönnum hvernig okkar framtíðar samgöngumáti á að vera án þess að við eigum lokaorðið, því það erum jú við sem ætlum okkur að búa hér og nýta okkur þennan nýja samgöngumáta að mestu leiti.

Það verður að vera á hreinu hvort mögulegt er að ráðast í jarðgangnagerð og hvað það kostar.

Ég er á þeirri skoðun að ef mögulegt er að grafa göng er það sennilega hagkvæmasti kosturinn ef litið er til næstu 50-100 ára, Ég reikna með að þú sért á sama máli, við ætlum okkur að búa hér í Eyjum áfram og vonumst við til þess að flestir Eyjamenn hugsi á svipaðann hátt.

þegar ég segi þetta á ég við að eftir 20 ár þarf fólk sennilega enn að ferðast milli staða á svipuðum farartækjum og í dag sem segir okkur að ef ráðist verður framkvæmd á Bakkafjöru verður krafan um göngin enn háværari með hverju ári sem líður. Þrátt fyrir að göngin verði slegin út í bili fyrir Bakkafjöru eða nýs Herjólfs verður krafa framtíðarsamgangna alltaf að geta ferðast til og frá Eyjum þegar okkur hentar hverju sinni, hvenær sem er.

 Ég er á þeirri skoðun að framkvæmdin á Bakkafjöru er góð og gild þegar rannsóknirnar á jarðgöngum eru fullkannaðar og hægt er að útiloka þann möguleika algjörlega, og af hverju? við getur reiknað með að fara með 15 milljarða í gerð bakkafjöru, viðhald á því mannvirki, útskiptingu og viðhaldi á skipi sem siglir milli lands og Eyja á næstu 20-30 árum, þessir 15 milljarðar væru betur settir í einu patent framtíðarlausnina fyrir Eyjamenn sem eru nánast viðhaldslaus jarðgöng milli lands og Eyja.

[Grétar Ómarsson, 24.2.2007 kl. 15:02]

Það sem ég á við með þessu er að við erum að sóa gífurlegum fjármunum í Bakkafjörumillileikinn sem þú nefndir.

Þú talar um tímann sem munað sem við getum ekki leyft okkur? ég átta mig ekki beint á hvað þú átt við, en ef ég skil þig rétt vil ég meina að mesta tímasóun sem við Eyjamenn gætum upplifað er framkvæmdin á ferjulægi í Bakkafjöru, því sú framkvæmd myndi tefja möguleika Eyjamanna um von á jarðgangnagerð um áratugi, og að auki er rugl að sóa tugum milljarða í skammtímalausn áður en lokið hefur verið við rannsókn á jarðgöngum.